Se o Día do libro empezou dunha maneira especial o final da xornada foi excepcional. Tivemos no noso instituto o privilexio de ver a estrea dunha representación teatral á que lle agardan moitos éxitos.
No quiero ser Dulcinea é unha viaxe por sete obras literarias significativas da literatura castelá (La Celestina, La vida es sueño, Don Juan Tenorio, La Regenta, La tía Tula, Yerma e Cinco horas con Mario). Un percorrido especial da man dunha personaxe feminina de cada unha desas obras. Así, vaise conformando un retrato da condición da muller (coas súas preocupacións, frustracións, ilusións...) ao longo dos 500 anos nos que se enmarcan os títulos escollidos.
Pero, ademais, No quiero ser Dulcinea é un espectáculo teatral en toda regra, mercede a unha actriz que xa ten demostrado o seu bo facer na escena galega: Ursia Gago. Coa súa forza interpretativa deixounos coa boca aberta e, incluso, a algúns coa vista algo máis ca enturbiada pola emoción.
Esta obra, unha maxistral clase de literatura en cincuenta e cinco minutos, aproximadamente, é tamén o resultado dun gran traballo colectivo da man de Alfredo Conde Mariñas (dirección), Natalia Pérez Prado (dirección artística e produción), Félix Pérez (vestiario) e outros.
Non podemos menos que desexarlle a Ursia Gago e a No quiero ser Dulcinea que o IES Aquis Querquernis de Bande fose o comezo dun longo camiño...
No quiero ser Dulcinea en Bande by Slidely Photo Gallery
Recoñecedes cada unha das sete mulleres que aparecen representadas nas fotos? Fixádevos ben...
